‘சிவா மனசுல சக்தி’ என்ற வெற்றிகரமான பொழுதுபோக்கு படத்தை இயக்கிய ‘இயக்குனர் ராஜேஷ்’ இயக்கத்தில் உருவாகியிருக்கும் நகைச்சுவையான காதல் படமே ‘பாஸ் என்கிற பாஸ்கரன்’! இப்படத்தின் நாயகனாக ஆர்யாவும், அவருக்கு ஜோடியாக நயன்தாராவும் நடித்திருக்கின்றனர். ‘சிவா மனசுல சக்தி’ படத்தில் தனது நகைச்சுவை மூலம் ரசிகர்கள் வயிற்றை புண்ணாக்கிய சந்தானம், இப்படத்திலும் ரசிகர்களை மகிழ்ச்சிப்படுத்த காத்திருக்கிறார்.
KS ஸ்ரீநிவாசனின் ‘Vasans Visual Ventures’ நிறுவனம், ஆர்யாவின் ‘The Show People’ நிறுவனத்துடன் இணைந்து இப்படத்தை தயாரித்துள்ளது. முதலில் ஆர்யா வெளியிடுவதாக இருந்த இப்படம், தற்பொழுது உதயநிதி ஸ்டாலினின் ‘ரெட் ஜெயன்ட்’ நிறுவனத்தால் வெளியிடப்பட உள்ளது. மிகவும் பிஸியான, தமிழ் சினிமாவின் பிரபலமான இசையமைப்பாளர்களுள் ஒருவருவரான, யுவன்சங்கர் ராஜா இப்படத்திற்கு இசையமைத்திருக்கிறார்.
தனது எதிர்காலத்தைப் பற்றியோ, தனது சொந்த வாழ்க்கையைப் பற்றியோ கவலைப்படாது, மற்றவர்களுக்காக வாழும் ‘பாஸ்கரன்’ என்ற இளம் நாயகனனின் வாழ்கை, அழகானதொரு இளம் பெண்ணின் சந்திப்பிற்குப் பின் எவ்வாறு மாறுகிறது..?(எல்லாம் காதல் ஜாலம் தான்!?) என்பதை ‘பாஸ் என்கிற பாஸ்கரன்’ படம் பிடித்து காட்டியிருக்கிறது.
1.அட பாஸ் பாஸ் – சத்யன்
அறிமுகப் பாடல்!! ஆர்யாவின் ரசிகர்களை குஷிபடுத்தும் நோக்கில் உருவாக்கப்பட்டுள்ளது. சத்யனின் குரல், வேகமான இசையுடனும், பாடலின் சூழ்நிலையுடனும் கச்சிதமாக பொருந்தியிருக்கிறது. இருப்பினும் புதுமை மட்டும் இல்லை?! வேல் படத்தின் ‘கோவக்கார கிளியே’ பாடலின் மறுபிரதி போல உள்ளது. என்னாச்சு யுவன.???
2.யார் இந்த பெண்தான் – ஹரிசரண்
மென்மையான, இனிமையான இசையுடன், ஹரிசரணின் குரலும் அழகாக விரவி வந்து உடனடியாக மனதை கவர்கிறது. தந்தி இசை கருவிகளின் உதவியுடன், பாடலின் பின்னணி இசையை யுவன் அருமையாக அமைத்திருக்கிறார். ஏற்கனவே கேட்டது போல் தோன்றாமல், மனதிற்கு புதுமையான உற்சாகத்தை ஊட்டுகிறது. பாடலை கேட்கும்போது, ‘யாரடி நீ மோகினியின்’, ‘எங்கேயோ பார்த்த..’ பாடலை போல் படமாக்கப் பட்டிருக்கலாம் என தோன்றுகிறது
3.தத்தி தாவும் பேப்பர் நான் – கார்த்திக்
கேட்பதற்கு குளுமையான பாடல்! ‘தத்தாரே த த தா’ என்ற ஹம்மிங்குடன் பாடல் துவங்குவதிளிருந்து, இறுதிவரை கேட்பதற்கு இனிமையானதாகவே அமைந்திருக்கிறது. கார்த்திக்கின் இயல்பான பாடும் விதம் பாடலுக்கு மிகப்பெரிய பலமாக அமைந்திருக்கிறது. இப்பாடலில் யுவன் மீண்டும் தனது திறமையை நிரூபித்திருக்கிறார். பட்டியல் படத்தின் ‘ஏதோ ஏதோ எண்ணங்கள்’ பாடலை போன்ற இப்பாடலும் நிச்சயம் வெற்றி பெரும். பாடல் வரிகளில், ‘ஹீரோ ஹோண்டா’, ‘சிகரட் பாக்கெட்’, ‘ஜீரோ பக்கத்தில் கோடுதான் போடுற’,’மரேஜ் பண்ண தேவலை’ போன்ற வித்யாசமான, புதிய வார்த்தைகள் இடம் பெற்றுள்ளன.
4.அயிலே அயிலே – விஜய் பிரகாஷ்
‘காதல் அணுக்கள்’ பாடலின் மூலம் ரசிகர்களின் கவனத்தை ஈர்த்த விஜய் பிரகாஷ் இந்த ஜாலியான பாடலை பாடியுள்ளார். இப்பாடல் புகைவண்டியில் வைத்து பாடப்படுகிறதா..? இல்லை பாடலின் தோணி புகைவண்டியில் இருப்பது போன்ற உணர்வை நமக்கு அளிக்கிறதா..? என்று கணிக்க முடியவில்லை. இப்பாடல் யுவனின் மற்றொரு மாயஜாலம்..! மேலிருந்து கொட்டும் அருவி போல தங்குதடையின்றி, இசை, சந்தங்கள், எதிரோலிப்புகள் பாடல் முழுவதும் பவனி வருகின்றன. ‘பாஸ் என்கிற பாஸ்கரன்’ படத்தின் சிறந்த பாடலாக இப்பாடலை தேர்ந்தெடுக்கலாம்.
5.மாமா மாமா – விஜய் யேசுதாஸ், ஸ்வேதா மோகன்
‘மாமா மாமா உன் பொண்ண குடு மாமா’ என பாடலின் முதல் வரியை கேட்கும்போது, சூப்பர்ஸ்டாரின், ‘மாமா உன் பொண்ண குடு’ என்ற ‘ராஜாத்தி ராஜா’ பட பாடல் ‘ரீமிக்ஸ்’ செய்யப்பட்டிருக்கிறதோ என எண்ணத்தோன்றுகிறது. யுவன் ‘ரீமிக்ஸ்’ பாடல்களை எளிதாக கையாள்வார் என்ற போதிலும், இப்பாடலின் இசை சற்று வித்தியாசமானதாக அமைக்கப் பட்டிருக்கிறது. இருப்பினும் பாடலை கேட்கும்போது தாஸ் படத்தின். ‘வா வா வா, நீ வராங்காட்டி போ..’ பாடலை நினைக்காமல் இருக்க முடியவில்லை. ஸ்வேதா மோகனின் குரல் பாடலுடன் இயல்பாக ஒன்றியிருக்கிறது.
பொதுவாக யுவனின் இசையில் ‘டூயட்’ பாடல்களை அபூர்வமாகவே காண முடியும். பானா காத்தாடியில் ஒரு ‘டூயட்’ பாடல் மட்டுமே இடம்பெற்றிருந்த போதிலும் கடைசியாக வந்த தில்லாலங்கடி, ‘பாஸ் என்கிற பாஸ்கரன்’ என இரண்டு படங்களிலுமே குறிப்பிடத் தகுந்த ‘டூயட்’ பாடல்கள் இடம்பெற்றிருக்கின்றன. ஒரு படத்திற்கு தேவைப்படுவதால் அதிக அளவில் தனிப் பாடல்கள் இடம்பெறுகின்றனவா? அல்லது ரசிகர்களது விருப்பம் அவ்வாறாக உள்ளதா? என்பது கேள்விக்குறியாகவே உள்ளது. இருப்பினும் தனிபாடலானாலும், டூயட் பாடல்களானாலும், “சிறந்த பாடல்களை” ரசிகர்கள் எப்பொழுதும் ரசிக்க தவறுவதேயில்லை!!!
